Apa Cerita......dimasukkan biji gandum didalam telinga

Tadi sewaktu makan malam, Anih bercerita karenah anaknya yang ketiga, Mohd.Aqiel Shafie. Ceritanya macam ani……..

Sewaktu hampirkan tidur, Aqiel ani menggaru-garu telingnya. Mula-mula Anih fakir perkara biasa. Mungkin jua telinganya atu gatal. Dibiarkannya tia saja.

Inda lama kemudian, lakat lagi digaru-garunya. Salah fikir Anih ani. Mungkin jua banyak tahi telinganya. Lalu diambilnya pengorek telinga.

Kamu tau apa yang didapatinya. Bukan tahi telinga tapi cebisan kain yang dimasukkan si Aqiel di telinganya ani.

Wah cerita Anih ani mengingatkan kisah Pa Basai lagi damit. Entah macam mana satu hari sebiji biji gandum iaitu dari keropok gandum  dimasukkan oleh samada oleh orang lain atau diri Pa Basai sendiri( sampai ani masih misteri) kedalam telinga sebelah kiri Pa Basai. Waktu atu seingat Pa Basai, Pa Basai tuduh Hjh Hasmah (kaka Pa Basai) yang memasukkan kedalam telinga Pa Basai. Tapi inda ia mengakun. Sampai hari ani inda ia mengakun.

 Wah pada mulanya Pa Basai inda bunyi-bunyi tetapi sesudah sakit baru tah diberi tau arah bapa. Apa lagi sebuk tah  orang mencuba untuk mengeluarkannya  termasuk yang Pa Basai ingat  Bapa, Babu, Mama (Hjh Tengah  kakak Bapa) Dhee (Awang) dan Kalaki (Hj.Bakir). Bermacam gaya dan teknik digunakan. Ada yang menggunakan minyak, inda jua mau. Dipakai angkup inda jua menggalih. Dikorek, disungkit , diambit, biji gandum ani basar bah inda jua mau keluar. Akhirnya bapa bawa tah Pa Basai ke hospital, baru tia mau dikeluarkan.

 Eh Pa Basai ingat, Pa Basai kana tahan sehari pakah.

Misterinya siapa yang memasukkan kedalam telinga atu? Sampai hari ani inda tajawab.

Nah, mungkinkah waris memasukkan benda kedalam telinga ani sudah turun kecucu? Heh! Heh! Heh!

 

Pa Basai